Gianni Schicchi – waarskynlik Puccini se gewildste buffo-karakter – besoek die Endler-verhoog! Hierdie slinkse en vindingryke bedrieër se hulp word deur die naasbestaandes ingeroep wanneer hulle vasstel dat die die pas afgestorwe oom Buoso sy skatte aan die kerk bemaak het. Origens is Schicchi se dogter Lauretta gretig om Buoso se nefie Rinuccio tot ‘n huwelik te bring: in haar aria O mio babbino caro oortuig sy haar pa om in te stem.

Familie-vetes, ‘n vervalste testament en ‘n goeie skeut humor maak hierdie blyspel wat in geheel op die Endler-verhoog aangebied word, ‘n moet. Die sang-afdeling, huidige en alumni-studente van die Konservatorium staan onder die leiding van José Dias, met Magdalene Minnaar as ervare verhoogleier. Fiona Du Plooy is verantwoordelik vir die nodige choreografiese aksent in hierdie produksie van Puccini se altyd   gewilde buffo-opera.