As deel van die Endler Konsertreeks sal pianis José Dias ‘n program wy aan die genre van klavierballades. Dit vind plaas op Saterdag, 4 November om 20:00 in die Endlersaal, Stellenbosch.

Hierdie is ‘ unieke program om die luisteraar bekend te stel aan uitsonderlike “vertellende” musiek, in die vorm van klavierballades van Brahms, Grieg, Fauré, en die Suid-Afrikaanse komponis, Hendrik Hofmeyr. Die werke is uitgebreide enkeldeelwerke, met heelwat dramatiese kontraste, liriese momente en intense musikale digkuns.

José Dias het die BMus Honneurs-graad cum laude van die Universiteit van Stellenbosch verwerf, met spesialisering in klaviersolo-uitvoering. Na verdere studie aan die Hochschule für Musik und Theater in Zürich (Switserland), het hy teruggekeer na Suid-Afrika, en ‘n pos aanvaar as repetiteur by die Kaapstad Opera, ‘n poisie wat hy tot 2011 beklee het. Dias is tans besig met ‘n PhD-studie in Solo-uitvoering aan die Universiteit van Kaapstad, onder leiding van Proff. François du Toit en Hendrik Hofmeyr, en is ook ‘n deeltydse dosent aan die Musiekkollege daar.