Die 2023 USSO Jeug Concerto-fees word weer op 8 September in die Endler gehou. Jong soliste wat suksesvol oudisies afgelê het om by hierdie fees op te tree, sal saam met die Universiteit Stellenbosch Simfonieorkes (USSO) speel onder leiding van prof. Corvin Matei, wat ook vanjaar sy 70ste verjaardag vier. Die Fees, wat tradisioneel elke 2de jaar gehou word, dien as ‘n lanseerplatform vir bekwame klassieke musikante en sangers om saam met ‘n simfonieorkes op te tree. Weens Covid-beperkings is die laaste geleentheid in 2019 gehou.